Begirlich in dem Herzen min
mit rechter Lieb in Stetigkeit
Hab ich gedacht din eigen zu sin
das weistu nit, das ist mir leit
Doch mus ich also liden mich
biß das ich inne bringe dich
das als min hoffen an dir lit
Ich wolt du wisset min begir
wie gar senlich verlanget mir
min eigen hertz erkennen git
Nun froewst Du mich und weist das nit
davon muos ich belangen han
Von senen mir min hertz zerbricht
solt ich dich das nit wissen lan
so will ich unmuot mir gesellen
und all min froed in truren stellen
biß glick mir bringet gnaden zit
Ich wolt du wissest min begir
wie gar senlich verlanget mir
min eigen hertz erkennen git
Ob es min glück fügen möht
das jr von mir möcht werden kunnt
wie gar besunder usserwelt
hab ich dich in min hertzens grunt
So wer mir heils gar vil beschert
und mich von unmuot gar ernert
unmuot wönt mir, verr und wit
Ich wolt du wissest min begir
wie gar senlich verlanget mir
min eigen hertz erkennen git